Tababaraha cusub ee Real Madrid, Xabi Alonso, ayaa si cad u sheegay in kooxda ay u baahan tahay weeraryahanka reer Brazil ee Rodrygo, xilli warar xoogan ay la xiriirinayaan inuu u wareegayo Arsenal xagaagan.
Alonso ayaa sidoo kale ka hadlay labada xiddig ee kale ee weerarka, Kylian Mbappé iyo Vinícius Junior, isagoo sheegay in kooxda ay u baahan tahay inay si buuxda uga faa’iideysato awooddooda.
Isagoo ka hadlayay shirkiisii jaraa’id ee ugu horreeyay tan iyo markii loo magacaabay tababaraha cusub ee Real Madrid, Alonso wuxuu yiri:
“Rodrygo waa ciyaaryahan Real Madrid ah. Waa ciyaaryahan heer sare ah waana u baahan nahay.”
Wuxuu intaas ku daray:
“Vini Jr. iyo Mbappé? Waa in aan ka faa’iideysannaa awooddooda ugu fiican.”
Waxaa xusid mudan in Rodrygo uu xiiso ka helayo kooxda Arsenal xagaagan, iyadoo warar sheegayaan in ciyaaryahanka 24-jirka ah uu dalbanayo mushaar gaaraya €10 milyan sanadkii si uu ugu biiro Gunners.
Si kastaba ha ahaatee, kooxda Waqooyiga London ee Premier League-ka ayaa la sheegayaa inaysan diyaar u ahayn inay bixiso mushaharkaasi sare.