Weeraryahanka reer Sweden, Viktor Gyökeres ayaa la sheegay inuu u sheegay qoyskiisa iyo saaxiibadiisa in uu filayo inuu Sporting Lisbon uga wareego kooxda Arsenal xagaagan, sida ay warinayaan ilo dhowr ah oo la xiriira suuqa kala iibsiga.
Gyökeres, oo 27 jir ah, ayaa noqday mid ka mid ah weeraryahanada loogu baahida badan yahay Yurub kaddib xilli ciyaareed cajiib ah oo uu la qaatay Sporting Lisbon, isagoo dhaliyay 54 gool 52 kulan gudahood, taasoo ka caawisay kooxda inuu ku hogaamiyo laba koob oo gudaha ah.
Kooxaha waa weyn sida Juventus, Atletico Madrid, iyo Manchester United ayaa si xoogan loola xiriirinayay Gyökeres. Man United ayaa la fahamsan yahay inay u soo bandhigtay heshiis lacageed oo weyn si uu weerarka kooxda u hoggaamiyo, balse xiddiga reer Sweden ayaa si cad u doorbiday inuu ciyaaro Champions League, taasoo keentay in uu diido Old Trafford, una jiheysto dhanka Arsenal.
Kooxda Arsenal ayaa haatan lagu tilmaamayaa inay hogaanka u hayso saxiixa Gyökeres, iyada oo ay jiraan warar sheegaya in weeraryahanka uu durba qaraabadiisa u sheegay in ay filan karaan inuu xilli ciyaareedka dambe xirto maaliyadda Gunners.
Si kastaba, heshiiska ayaa wajahaya caqabado – xiriir xun oo u dhexeeya wakiilka Gyökeres, Hasan Cetinkaya, iyo madaxweynaha Sporting, Frederico Varandas, ayaa waxyaabo badan khasay. Varandas ayaa beeniyay in uu jiro “heshiis is-af garad ah” oo u ogolaanaya ciyaaryahanka inuu £59 milyan kaga tago kooxda.
Hase yeeshee, Gyökeres ayaa aaminsan in xal laga gaari doono arrintaas, wuxuuna ku rajo weyn yahay in heshiiska uu ku aadi karo Emirates Stadium la dhameystiri doono waqtigeeda.
Haddii ay arrintu sidaas ku dhammaato, Arsenal waxay heli doontaa weeraryahan dhamaystiran oo heer sare ah, isla markaana leh awood, xirfad iyo rabitaan ciyaareed oo sare.