Kabtan-ku-xigeenka Liverpool iyo daafaca bidix ee muddada dheer kooxda u adeegayay, Andy Robertson, ayaa si geesinimo leh uga hadlay wararka sheegaya in Reds ay doonayaan laacibka Bournemouth iyo xulka Hungary, Milos Kerkez – kaas oo loo arko beddelka mustaqbalka ee 31-jirkan reer Scotland.
Robertson, oo haatan galay sanadkii ugu dambeeyay ee qandaraaskiisa Anfield, ayaa sheegay inuusan ka welwelin tartanka uu la kulmi karo haddii Kerkez la keeno kooxda.
“Annagu doqomo ma nihin – waxay u muuqataa in heshiis la samayn karo,” ayuu Robertson u sheegay BBC Scotland. “Laakiin ilaa heshiiskaas la xaqiijiyo, kama fikirin xitaa hal mar mustaqbalkeyga.
“Naftayda ayaan ku kalsoonahay. Waxaan rumeysanahay kartideyda, taas ayaana iga caawisa inaan hore u socdo.”
Robertson ayaa ku faanay siddeed sano oo uu ku qaatay Liverpool isagoo ah xubin muhiim ah oo guulo waaweyn la gaaray – oo ay ka mid yihiin laba horyaal oo Premier League ah iyo hal Champions League.
“Ma yaraanaayo, waana ogahay in da’daydu kor u sii kacayso. Laakiin weli waxaan dareemayaa in aan wax badan kusoo kordhin karo kooxda – taas ayaana ah waxa aan diiradda saarayo.
“Naftayda ayaan eegaa, ma fiiriyo cidda aan la tartamayo ama cidda imanaysa.”