Sida uu xaqiijiyay weriyaha caanka ah ee The Athletic, David Ornstein, xiddiga garabka uga ciyaara Chelsea, Noni Madueke, ayaa heshiis shaqsi ah la gaaray kooxda Arsenal.
Inkasta oo Madueke uu ogolaaday shuruudaha shaqsiga ah, haddana Arsenal weli si rasmi ah ugama aysan codsan Chelsea saxiixa ciyaaryahanka reer England. Wararka la helayo ayaa sheegaya in Gunners ay sugayaan dhamaadka Koobka Adduunka ee Naadiyada (Club World Cup), iyadoo Chelsea ay haatan ku sugan tahay semi-finalka tartankaas, waxayna wajahayaan kooxda Fluminense.
Ornstein wuxuu sheegay in Arsenal ay si buuxda diiradda u saarayso Madueke, maadaama uu ciyaari karo labada garab – midig iyo bidix, taasoo ka dhigeysa xiddig boosas badan kaban kara.
Labada kooxood ee Chelsea iyo Arsenal ayaa leh xiriir wanaagsan, waxaana suurtagal ah in heshiiska loo dhammeeyo si degdeg ah haddii ay Arsenal miiska soo saarto dalab u dhexeeya £40m ilaa £45m.