Weeraryahanka Manchester United, Marcus Rashford, ayaa lagu soo waramayaa inuu diiday inuu ku biiro saddex kooxood oo ka tirsan horyaalka Premier League, iyadoo ay sii kordhayaan wararka sheegaya in Barcelona ay xiisaynayso 27-jirka.
Saddexda kooxood ee uu Rashford ka diiday dalabka ayaa la rumeysan yahay inay yihiin:
Chelsea
Newcastle United
Aston Villa, oo uu kala qeyb galay qeybtii labaad ee xilli ciyaareedkii hore isagoo amaah ah.
Xiddigan reer England ayaa doonaya inuu si rasmi ah uga tago kooxda Manchester United, isagoo raadinaya mustaqbal cusub.
Dhanka kale, Barcelona ayaa diiradda saartay saxiixa Nico Williams oo ka tirsan Athletic Club Bilbao. Xiddiga reer Spain ayaa la aaminsan yahay in heshiiskiisa lagu burburin karo €58 milyan, waxaana la filayay inuu ku biiro Barca xagaagii hore.
Sida laga soo xigtay wargeyska Sport, Barca waxay hadda qorshaynaysaa inay dhamaystirto saxiixa Williams, balse sidoo kale waxay diyaar u yihiin inay Rashford ka dhigtaan beddel ama xoojin dheeri ah oo garabka ama weerarka ka ciyaara.