Tababaraha Manchester City Pep Guardiola ayaa si lama filaan ah ugu magacaabay Bernardo Silva kabtanka cusub ee kooxda, sida uu ku waramay Daily Mail.
Waa go’aan ka duwan dhaqankii caadiga ahaa ee City, oo ay ciyaartoyda iyo shaqaalaha farsamada si dimuqraadi ah u codeyn jireen si loo doorto kabtanka. Xilligan, Guardiola ayaa go’aanka keligiis qaatay.
Waxaa sidoo kale la magacaabay afar hoggaan:
Kabtan: Bernardo Silva
Kabtan ku-xigeenno: Ruben Dias, Rodri, iyo Erling Haaland
Bernardo Silva, oo 30 jir ah, waxa uu ku jiraa sannadkiisii ugu dambeeyay ee qandaraaskiisa (dhamaadka 2026), inkastoo la saadaalinayo in uu ka tagi karo kooxda xagaagan ama kan xiga.
Maxay Tahay Micnaha Go’aankan?
Bernardo ayaa si weyn looga tixgeliyaa gudaha qolka labiska, isagoo kamid ah ciyaartoyda ugu khibradda badan ee kooxda.
Go’aanka Guardiola waxa uu muujinayaa kalsoonida uu ku qabo Silva – xitaa haddii uu ka tago xilli ciyaareedkan, wuxuu noqonayaa kabtan sharafeed oo ay ciyaartoydu ku daydaan.
Waxa kale oo laga dhadhansan karaa in Guardiola doonayo in Silva ku sii nagaado kooxda ugu yaraan hal sano oo kale.
Silva ayaa City kula guuleystay Premier League 6 jeer, Champions League hal mar, iyo koobab kale oo fara badan tan iyo markii uu kasoo baxay Monaco 2017.
Hadduu sannadkan yahay kan ugu dambeeya Silva ee Etihad, wuxuu kaga tagi karaa qaab maamuus leh.