Manchester United ayaa dalabkoodii ugu horreeyay ee rasmi ah ka gudbisay weeraryahanka Brentford, Bryan Mbeumo, sida uu sheegayo weriyaha caanka ah ee The Athletic, David Ornstein.
Red Devils ayaa soo bandhigtay £45 milyan oo lacag ah iyo £10 milyan oo dheeri ah oo ku xiran waxqabadka xiddiga, balse dalabkan ayaa si weyn uga hooseeya waxa Brentford ay rajaynayso inay ku hesho xiddigooda muhiimka ah.
Wadahadallada labada kooxood ayaa weli socda, iyadoo Mbeumo oo 25 jir ah uu xiiseynayo ku biirista Manchester United.
Xilli-ciyaareedkii hore, Mbeumo wuxuu ka mid ahaa weeraryahanadii ugu waxqabadka wanaagsanaa Premier League, isagoo dhaliyay 20 gool isla markaana caawiyay 8 kale.
United ayaa doonaysa in laacibkan reer Cameroon uu noqdo qeyb ka mid ah dib-u-dhiska kooxda xilli ciyaareedka soo socda.