Wargeyska Diario Sport ayaa soo warinaya in Luis Diaz uu doorbidayo inuu sii joogo Liverpool xilli ciyaareedka dambe halkii uu u wareegi lahaa Barcelona ama koox kale.
Diaz ayaa Khamiistii si cad u sheegay in uu rajeynayo inuu helo heshiis cusub oo uu kooxda kula sii joogayo.
“Haddii Liverpool ay i siiso dalab wanaagsan, ama haddii aan iska sii joogo labada sano ee ka dhiman qandaraaskayga, waan ku farxi doonaa — go’aanka iyaga ayuu hadda gacantooda ku jiraa,” ayuu yiri garabka reer Colombia.
Haddii Liverpool aysan u soo bandhigin heshiis cusub sida uu rabo, Diaz wuxuu xiiseynayaa inuu u ciyaaro Barcelona.
Sidoo kale, xiddigan waxaa xiiseynaya kooxo ka tirsan horyaalka Saudi Arabia, balse wararka ayaa sheegaya in qoyskiisa ay doorbidayaan inay sii joogaan England ama ugu yaraan qaaradda Yurub.