Kooxda Liverpool ayaa si dhow isha ugu heysa saddex weeraryahan oo muhiim ah si ay u xoojiyaan weerarka ka hor xilli ciyaareedka cusub, sida uu sheegay weriyaha lagu kalsoon yahay ee Florian Plettenberg.
Hugo Ekitike oo u dhashay Faransiiska ayaa ah midka ugu sarreeya liiska. Wararka ayaa sheegaya in ciyaaryahanku uu xiiseynayo Anfield, balse uu ogyahay in u wareegistiisu u baahan karto in Liverpool marka hore ay iska iibiso qaar ka mid ah ciyaartoyda hadda joogta.
Alexander Isak, oo kasoo jeeda Sweden kuna sugan Newcastle, ayaa isna ah bartilmaameed muhiim ah. Isak wuxuu dhaliyay 27 gool wuxuuna bixiyay 6 caawin 42 kulan xilli ciyaareedkii la soo dhaafay – taasoo keentay in Liverpool si dhow ula socoto xaaladdiisa.
Sidoo kale, Victor Osimhen oo ah weeraryahanka Napoli iyo xulka Nigeria, ayaa ku jira liiska Liverpool. Osimhen wuxuu ka mid yahay weeraryahanada ugu awoodda badan Yurub, inkasta oo qiimihiisu sareeyo.
Liverpool waxay hadda si buuxda u qiimeyneysaa saddexda xiddig, iyadoo suurtagalnimada midkood uu kusoo biiro kooxda ay ku xirnaan doonto dhaqaalaha iyo xaalada suuqa kala iibsiga.