Difaaca Liverpool, Ibrahima Konate, ayaa dhiirrigelin adag u diray asxaabtiisa kooxda kahor bilowga xilli ciyaareedka 2025/26, isagoo ka digay in aysan is-dhigan maadaama ay hanteen horyaalka Premier League xilli ciyaareedkii hore.
“Waxa ugu muhiimsan waa inaanan ku nasan guusheenii hore. Waxaan ku guuleysanay Premier League, taasoo ahayd wax weyn oo farxad u keentay qof walba, laakiin taas kaliya naguma filna. Waxaan rabaa inaan mar kale ku guuleysto sannadka dambe – ama aan Champions League qaadno,” ayuu yiri Konate.
Wuxuu intaas ku daray:
“Marka xilli ciyaareedka cusub bilaabanayo, waa in aanan illoobin guushii aan gaarnay, sababtoo ah waa mid taariikhda gashay. Laakiin waa inaan meel dhigno oo isweydiinnaa: ‘Ma nagu jiraa rabitaankii hore, xoogii jidheed iyo maskaxeed ee aan ku guuleysanay sanadkii hore?’”
Konate ayaa sheegay in tartanku uu adkaan doono mar labaad:
“Waa mid aad uga adag, sababtoo ah hadda annaga ayaa horyaalka heysana, koox walbana waxay rabtaa inay naga badiso.”
Hadallada Konate ayaa muujinaya niyadda dagaal iyo u diyaar garowga ay Liverpool la geli doonto difaacashada horyaalka.