Xiddiga da’da yar ee Barcelona, Lamine Yamal, ayaa si firfircoon ugu ololeynaya in garabka Athletic Club, Nico Williams, uu ku soo biiro Camp Nou, sida uu sheegay suxufiga caanka ah ee Fabrizio Romano. Bilihii la soo dhaafay, Yamal ayaa si joogto ah ula hadlay Nico, isaga oo ku dhiirrigelinaya iney garoon wadaagaan.
“Inta aan ogahay, mar kasta oo Lamine fursad u helo inuu la hadlo Nico, wuu ku adkeystaa inuu la ciyaaro Barcelona,” ayuu yiri Romano. “Haddii uu hal ciyaaryahan u keeni lahaa Barca, Lamine wuxuu dooran lahaa Nico Williams.”
Riixitaanka joogtada ah ee Yamal ayaa imaanaya xilli wada-hadallo suuqa kala iibsiga ay socdaan. Nico Williams ayaa horay u diiday dalabkii Barca xagaagii hore, balse wararkii ugu dambeeyay waxay muujinayaan inuu hadda diyaar u yahay in uu ku biiro kooxda. Wakiilkiisa, Felix Tainta, ayaa dhawaan la kulmay Deco oo ah lataliyaha ciyaaraha ee Barcelona, taasoo calaamad u ah horumar suuragal ah.
Qoraalladii ugu dambeeyay ee Yamal uu baraha bulshada soo dhigay kuna xusayay Nico Williams, ma ahayn kuwa iska yimid. “Warkaas wuxuu macno u leeyahay wada hadallada socda, waxaana cad in Lamine si dhab ah u rajeynayo in Nico ku soo biiro Barca,” ayuu yiri Romano. “Wuxuu jeclaan lahaa inuu si joogto ah ula ciyaaro Nico.”
Labadan ciyaaryahan ee dhalinyarada ah ayaa muujiyay isfaham iyo kimistari heer sare ah xilliyada ay wada ciyaaraan xulka qaranka Spain, halkaasoo ay aad ugu raaxeystaan ciyaar wadaagga.
Taageerada muuqata ee Yamal iyo rajooyinka sii kordhaya ee heshiiska ayaa muujinaya rabitaanka Barcelona ee ah inay xoogga saaraan weerarka, iyagoo adeegsanaya ciyaartoy dhalinyaro ah oo gudaha dalka kasoo jeeda. Iyadoo Deco si toos ah uga shaqeynayo heshiiska iyo isfahanka labada ciyaaryahan ee garoonka dhexdiisa, Barcelona waxay u muuqataa inay heli karto xiddig muhiim ah xilli ciyaareedka soo socda.