Kaddib markii si rasmi ah loo shaaciyay inuu ka tagayo Real Madrid, Luka Modrić ayaa la filayaa inuu xagaagan ku biiro AC Milan.
Xiddiga khadka dhexe ee reer Croatia ayaa haatan matalaya Real Madrid tartanka Koobka Adduunka ee Naadiyada oo ka socda Mareykanka. Marka tartanku dhammaado, waxaa la filayaa inuu saxiixo heshiis uu ugu biirayo Milan, taasoo calaamad u noqon doonta dhammaadka waayihiisii guuleed ee uu ku qaatay Spain.
Agaasimaha AC Milan, Igli Tare, ayaa sheegay:
“Waxaan diyaar u nahay inaan keenno Luka Modrić, waxaan u baahannahay hoggaamiyeyaal cusub. Modrić wuxuu noqon karaa ciyaaryahan muhiim noo ah, wuuna na weydiiyay wax ku saabsan tartan adag iyo hanashada koobab… arrintaas waan ka shaqaynaynaa.”
Modrić, oo ku guuleystay abaalmarinta Ballon d’Or sanadkii 2018, ayaa ka tagaya garoonka Santiago Bernabéu isagoo la qaaday koobab badan, oo ay ku jiraan lix UEFA Champions League.