Daafaca Reds Ibrahima Konate ayaa sheegay inuu ku faraxsan yahay Liverpool inkastoo aysan jirin wax horumar ah oo laga gaaray wadahadallada heshiis cusub.
Konate ayaa haatan galay sannadkii ugu dambeeyay ee qandaraaskiisa haatan socda, waxeyna Liverpool mar kale wajahaysaa halis ah inay lumiso xiddig muhiim ah iyada oo aan wax magdhow ah helin; xaalad la mid ah tii hore ee Trent Alexander-Arnold, Virgil van Dijk, iyo Mohamed Salah, kuwaas oo kaliya labada dambe ay saxiixeen heshiisyo kordhin. Ilaa hadda, wadahadallada la xiriira qandaraaska cusub ee Konate ayaa u muuqda fashil.
Saxaafaddu waxay weli la xiriirisaa Konate — oo 26 jir ah — kooxaha PSG iyo Real Madrid, inkastoo uusan u muuqan mid ku degdegi doona inuu ka tago kooxda.
“Waxaan ogahay in aan wali higsanayo yoolal badan oo aan kooxdaan la gaaro: inaan noqdo hoggaan, inaan guul kasta la gaaro. Si daacad ah, waan ku faraxsanahay halkan,” ayuu yiri Konate.
“Wadahadal kale ayaa jiri doona oo u dhexeeya kooxda iyo wakiilkayga, aan aragno waxa dhaca toddobaadyada soo socda. Si run ah, uma hubo waqtiga, laakiin aan sugno oo aan aragno.”
“Ma jiro wax horumar dhab ah, laakiin wakiilkayga wuxuu la kulmay kooxda usbuucii hore. Ma sheegi karo wuxuu ii sheegay, laakiin aan aragno waxa dhaca,” ayuu yiri Konate, sida laga soo xigtay The Independent.