Kevin De Bruyne ayaa si rasmi ah u xaqiijiyay in uusan ku biiri doonin koox kale oo ka dhisan Premier League kaddib marka uu ka tago Manchester City, waxaana la filayaa inuu u wareego koox dibadda ah xilli ciyaareedka soo socda.
Xiddiga khadka dhexe ee reer Belgium, oo 33 sano jir ah, ayaa si murugo leh u macsalaameeyay taageerayaasha City intii lagu guda jiray ciyaartiisii ugu dambaysay ee Etihad Stadium Talaadadii. Sida laga soo xigtay warbixin ka timid The Telegraph, De Bruyne ayaa la rumeysan yahay inuu go’aansaday inuu mustaqbalkiisa ka sii wato meel ka baxsan Ingiriiska, taasoo calaamad u ah dhamaadka muddo toban sano ah oo uu ku sugnaa Premier League.
Kaddib markii uu xaqiijiyay inuu ka tegayo kooxda uu kula guuleystay guulo badan, De Bruyne ayaa si cad u sheegay inuusan doonayn inuu la tartamo Guardiola ama xiddigihii hore ee uu garabka u ahaa xilli ciyaareedka soo socda.
Waxaa la sheegay in kooxda Napoli ee Serie A ay xiisaynayso, halka kooxo badan oo ka tirsan Major League Soccer (MLS) ee Mareykanka ay sidoo kale muujiyeen rabitaankooda. Maaddaama uu hadda yahay ciyaaryahan xor ah, De Bruyne waxa uu xor u yahay inuu heshiis la galo koox kasta oo ka baxsan Ingiriiska kahor xilli ciyaareedka 2024/25.
Intii lagu guda jiray hadalkiisii sagootinta, De Bruyne ayaa si qiiro leh uga hadlay waayihiisii Manchester City, isagoo yiri: “Manchester waa gurigeyga, waa halkii ay ku dhasheen carruurtayda yar yar. Waxaan halkaan imid aniga iyo xaaskeyga Michelle, annaga oo doonaynay inaan sii joogno muddo, ma aanan fileynin inaan joogo toban sano. Wixii aan ku guuleysanay koox ahaan, taageerayaal ahaan, iyo saaxiibada kooxda, waxaan ku guuleysanay wax walba. Waxaan weynaynay kooxda iyo magaalada, waana hubaa inay sii socon doonaan oo xitaa ka sii weynaan doonaan.”
Ka tagista De Bruyne waxa ay calaamad u tahay dhammaadka cutub taariikhi ah oo uu ku lahaa Manchester City, isagoo kooxda la qaaday lix horyaal oo Premier League ah iyo hal koob oo Champions League ah.