Halyeeygii hore ee Chelsea, John Obi Mikel, ayaa aaminsan in kooxda uu horey ugu ciyaari jiray ay tahay inay si dhab ah isha ugu heyso xiisaha ay u qabto labada ciyaaryahan ee Manchester United – Alejandro Garnacho iyo Kobbie Mainoo.
“Waan jecelahay labadan ciyaaryahan,” ayuu Mikel u sheegay Metro. “Ma fahmayo waxa khaldan ee u dhexeeya Garnacho iyo Ruben Amorim, sababtoo ah aniga ahaan waa mid ka mid ah ciyaartoyda ugu fiican Man United.
“Kaddib waxaad maqleysaa in la doonayo in la iska diro Garnacho. Runtii? Anigu ma arko sabab macquul ah oo taa ka dambeysa, waayo mar walba oo uu ciyaaro wuxuu sababaa halis badan.
“Dhibaato laga yaabo inay tahay dhinaca difaaca, balse taas waa wax lagu shaqeyn karo iyadoo lala shaqeynayo ciyaaryahan da’yar si maskaxdiisa loo beddelo looguna wacyigeliyo mas’uuliyadda difaaca.
“Kobbie Mainoo, waxaa laga yaabaa inay dareemayaan inay u baahanyihiin inay iibiyaan si ay lacag u helaan. Waxaa laga yaabaa inuusan soo bandhigin wixii laga filayay, wuxuuna u muuqday mid liita.
“Ma garanayo waxa keenay hoos u dhacaas. Habka ciyaarta, tababaraha, mise jawiga kooxda? Waxaa jira arrimo badan oo la eegi karo marka laga hadlayo Manchester United.
“Haddii labadan ciyaaryahan ay yihiin kuwa Chelsea dooneyso, anigu si degdeg ah ayaan usoo qaadan lahaa. Labadooduba waxay keeni karaan horumar weyn oo kooxda ah. Waxaan ogahay haddii ay yimaadaan inay Chelsea sare u qaadi doonaan.”