Weeraryahanka kooxda Sporting CP, Viktor Gyökeres, ayaa si rasmi ah u diiday inuu ku biiro Manchester United, sida ay ku warrantay Record Portugal.
Wakiillada ciyaaryahanka ayaa si cad ugu wargeliyay Manchester United in Gyökeres uusan u arkin Red Devils koox la aqbali karo, taas oo ah dhirbaaxo weyn oo ku dhacday qorshaha kooxda ee suuqa kala iibsiga xagaagan.
United ayaa horey u rumaysnayd in ay kula wareegi karaan Gyökeres aduun dhan €60 milyan oo lagu daray €10 milyan oo gunno ah, laakiin madaxweynaha Sporting ayaa si adag u sheegay inaysan ciyaaryahanka ku iibin doonin wax ka yar €100 milyan.
Madaxweynaha kooxda ayaa intaa ku daray eedeyn culus oo uu u jeediyay wakiilka Gyökeres, isagoo ku tilmaamay inuu adeegsanayo “hanjabaado iyo cadaadis sharci darro ah” si uu ciyaaryahanka uga saaro kooxda.
Manchester United ayaa wali raadinaysa weeraryahan cusub, balse hadda waxay u muuqataa in ay tahay inay qorshahooda ay u weecin doonaan jiho kale, maadaama Gyökeres gebi ahaanba meesha ka baxay.