Kooxda Chelsea ayaa loo soo bandhigay fursad ay £45 milyan kula soo saxiixan karto goolhayaha Aston Villa iyo xulka Argentina, Emiliano Martinez, xagaagan.
Aston Villa ayaa la fahamsan yahay inay diyaar u tahay inay iibiso 32-sano jirkan si aynan si bilaash ah u lumin mustaqbalka dhow, maadaama uu goolhayuhu galay sannadihii ugu dambeeyay ee qandaraaskiisa. Kooxda Midlands-ka ayaa og in Chelsea ay si firfircoon suuqa ugu jirto si ay u hesho goolhaye cusub oo heer sare ah.
Martinez, oo door muhiim ah ka ciyaaray hanashada Koobka Adduunka 2022, ayaa sidoo kale lala xiriirinayaa Manchester United, kuwaasoo ay u muuqato in ay baahi u qabaan xoojin cusub oo booska goolka ah.
Si kastaba ha ahaatee, tababaraha cusub ee United, Rúben Amorim, ayaa la rumeysan yahay in uusan mudnaan siin doonin saxiixa Martinez, maadaama uu diiradda saarayo xoojinta khadka dhexe iyo weerarka.
Xaaladdan ayaa albaab u furtay Chelsea, oo haatan fursad u haysata inay sare u qaaddo dalabkeeda. Goolhayeyaasha kooxda – Robert Sánchez iyo Filip Jörgensen – ayaa labaduba ku guuldarreystay inay muujin karaan kalsooni buuxda xilli ciyaareedkii tagay.
Chelsea ayaa dooneysa in ay hesho goolhaye si buuxda ugu qalma No.1 ee kooxda, waxaana Martinez lagu tiriyaa mid si dhaqso ah uga jawaabi kara cadaadiska iyo heerarka Premier League.
Waxaa weli la sugayaa haddii Blues ay diyaarin doonaan dalab rasmi ah toddobaadyada soo socda.