Xiddiga khadka dhexe ee Ghana, Thomas Partey, ayaa si rasmi ah uga tagaya Arsenal kadib markii wada-hadalladii qandaraas kordhinta ay burbureen, sida uu xaqiijiyay Fabrizio Romano.
Qandaraaska Partey wuxuu ku egyahay dhammaadka bishan Juun (2025), mana jiri doono wax cusboonaysiin ah – taas oo ka dhigan in uu si xor ah uga baxayo kooxda.
Sababaha uu uga tagayo Arsenal waxaa kamid ah:
Dalab uu Partey doonayay oo mushaar kordhin ah, taasoo ay Arsenal ka caga jiiday maadaama:
Da’diisa (32 jir) ay tahay
Taariikhdiisa dhaawacyada – Wuxuu seegay 81 kulan tan iyo markii uu ku biiray kooxda sanadkii 2020.
Inkastoo uu xilli ciyaareed wanaagsan qaatay (52 kulan, 4 gool iyo 3 caawin), Arsenal waxay go’aansatay in aysan halis gelin miisaaniyadda kooxda.
Bedelkiisa Arsenal waxay u jeesatay:
Christian Nørgaard – Ciyaaryahan khibrad leh oo 31 jir ah kana tirsan Brentford, loogana dan leeyahay in uu buuxiyo booska Partey.
Partey wuxuu hadda xor u yahay inuu la saxiixdo koox kasta, iyadoo ay jirto xiiso uga imaanaya horyaalka Serie A iyo kooxo Carbeed.
Waxaa la filayaa in Arsenal ay sii wado dib-u-habeynta khadka dhexe xagaagan.